MediaWiki-jorgaleapmi davvisámegillii
Nuortalašsámi gilkoris govva. Vižžojuvvon Norgga álbmotmusea čoakkáldagain. Liseansa: CC-by-SA 4.0
Jus anát Wikipedia davvisámegillii, de leat várra fuobmán ahte measta buot dieđut mat gávdnojit geavahanlavttas leat dál davvisámegillii. Ovdal ledje davvisámegiella, dárogiella ja eŋgalasgiella seahkálaga geavaheddjiide.
Wikimedia Norge lea jođihan barggu jorgalit MediaWiki davvisámegillii. MediaWiki lea rabas prográmmagálvu mii jođiha Wikipedia ja eará Wikimedia-prošeavttaid, muhto maiddái ollu eará neahttabáikkiid, sihke gávppálaš ja ii-gávppálaš. Áŋgireamos jorgaleaddji lea leamaš Kimberli Mäkäräinen, lingvista mas lea terminologiija spesialistasuorgin. Nappo lea ge su njunušgelbbolašvuohta juste hábmet sániid ja tearpmaid mat eai gávdno dan guoskevaš gillii, ja mii maid váldá vuhtii kultuvrra, historjjá ja giellahistorjjá. Dáid jorgalemiide adno nanu lingvistihkagelbbolašvuohta, ja ii ge leat mihkke hehttehusaid dat ge ahte son lea maid hárjánan Wikipedialaš gii čállá máŋggaid iešguđetge giellaveršuvnnaide.
Go smávit gielaide jorgalit teknihkalaš doahpagiid, de adno dávjá hutkáivuođa gávdnan dihte buriid jorgalemiid mat eatnašiidda leat oahppásat ja maid ipmirdit. Buot gielain lea dábálaš “boares” sániid váldit ođđa áššiide atnui, ja okta dain doahpagiin mainna Mäkäräinen lea eanemus duhtavaš WikiMedia jorgalemiid dáfus, lea “gilkor”. Gilkor lea mearka mii čájeha gii eaiggáduššá ovtta ealli. Dál geavahuvvo dat “tagg” jorgaleapmin, namalassii rievdadusaid merket iešguđet eavttuid mielde.
Nubbi ášši maid Mäkäräinen buktá ovdan, lea ahte MediaWiki terminologiija lea goabbatlágan Norgga ja Suoma bealde. Dábálaččat leat stuorámus erohusat davvisámegielas nuorta- ja oarjesuopmaniid gaskkas, muhto dás orru leamen nu ahte leat riikka rájit, eaige suopmanrájit, mat leat stuorámus faktorat. Sáhttet teknihkalaš doahpagat eanetlogugielain mat dasa leat váikkuhan.
MediaWiki jorgaleapmi lea oassin Wikimedia Norgga veahkis UNESCO álgoálbmotgielaid jahkelogežii. Prošeakta lea ruhtaduvvon NUUG Foundationis (Norwegian Unix User Group Foundation). Mii áigut maid jorgalit Wikipedia-app’a, sihke Androidas ja iOS, davvisámegillii, ja dán barggu lea Sámediggi ruhtadan.
Category: Ságat, Sámi máhttu