Nissonoasi nannen Wikipedias
Sigrun Espe veahkkin ođđadárogielat-Wikipedias. Govven: Aleksandar N. Zecevic. Vižžojuvvon Wikimedia Commons:is, CC BY-SA 4.0.
Máilmmiviidosaččat leat vuollel 15% Wikipedia čálliin ja divodeddjiin nissonolbmot. Prošeavttain “Nissonoasi nannen Wikipedias” mii bargat njulget dán dássehisvuođa ja láhčit dili nissonolbmuide.
Eanet máŋggabealátvuohta
Wikimedia Norge doarju ja movttiidahttá birrasiid mat áimmahuššet Wikipedia girjedárogillii, ođđadárogillii ja davvisámegillii. Dehálaš suorgi min barggus lea oččodit máŋggabealát máhtu, ja mii diehtit ahte min vehkiid demográfalaš čoahkkádus váikkuha dasa makkár máhttu čohkkejuvvo leksikonii ja dasa makkár geahččanguovlu artihkkaliin lea.
Čakčamánus gitta golggotmánnui 2021 kártiimet mii sohkabealejuogu dain Wikipedia-čálliin geat eanemusat leat buvttadan dáppe Norggas. Loguin leat dušše sii geat ieža leat válljen almmuhit iežaset sohkabeali, ja guđet nappo definerejit iežaset “dievdun” dahje “nissonin”. Dat geain lea eará sohkabealleidentitehta, dahje guđet eai almmut iežaset sohkabeali, gullet “amas” jovkui. Vaikko logut dan dáfus leat eahpesihkkarat, de lea čielga tendeansa das man stuora oassi leat dievddut, nissoniid ektui. Dušše 4% leat registrerejuvvon nissonin. “Amas” joavkkus leat 59%.
Ođđajagimánus 2023 geahčadeimmet dárkileappot daid veahkkebargiid geat barget iešguđetlágan doaimmahuslaš dahje teknihkalaš bargguid, dahje geat veahkkin oahpahit ođđa čálliid. Dás leat mis sihkkaris logut, go diehtit eanas olbmuid identitehtaid. Jahkemolsumis ledje 8% nissonolbmot dain rollain.
Eanet nissonovddastus sáhttá buoridit dássedeattu sohkabealeperspektiivvas Wikipedia sisdoalus. Dán prošeavttas eat dattetge fokusere sisdollui, muhto bargat ulbmitlaččat ja guhkit áigge badjel oahpahusfálaldagaiguin mat sáhttet buoridit nissonovddastusa.
Prošeaktabargu
Doaibmabijut:
- Mii áigut rekruteret ja bures čuovvolit nisson fáddariid. Muhtun fáddarat sáhttet sirdojuvvot Álggahanveahkki-bagadallin.
- Mii áigut rekruteret ja oahpahit nisson artihkkalčáliid ja lágidit Álggahanveahkke-diimmuid main leat nissonat ulbmiljoavkkus, ABM-ovttasbargoguimmiiguin fárrolaga (arkiivvat, girjerádjosat, museat). Doppe sáhttet ovttaskas olbmot dahje smávit joavkkut oažžut heivehuvvon oahpisteami Wikipedia-čállimii.
- Mii galgat bargat dan nammii ahte leat buori ja fátmmasteaddji deaivvadanbáikkit gos addojuvvo fágalaš lasáhus veahkkebargiide. Mii áigut eaktodáhtolaččaiguin fárrolaga lágidit Wikitreff Oslos ja unnimusat guovtti eará gávpogis. Mii áigut áŋgirit márkanfievrredit deaivvademiid nisson ulbmiljoavkkuide.
Loga movt beasat johtui Wikipedias
Prošeakta Nissonoasi nannen Wikipedias lea ruhtaduvvon Fritt Ord:as ja Bufdir:as.
Category: Nissonoasi nannen Wikipedias, Ságat, Sohkabealedássehisvuohta Wikipedias